Landa ingurunea dinamizatzeko helburua duten ekintzak diruz lagunduko ditu Eusko Jaurlaritzak 2025ean. Guztira 200.000 euro bideratuko ditu.

Laguntzen helburua honakoa izango da:

• Sektore pribatuak eta publikoak landa inguruneko gizarte ekitaldien finantzaketan parte har dezaten sustatzea, ingurune hori dinamizatzeko.
• Gizarte ekitaldi berriak sustatzea, eta landa ingurunean eragin positibo nabarmena dutenak sendotzea.
• Bere jardun-eremuan eragin ekonomikoa sortzea.

Hala, dirulaguntza jasotzeko aukera izango dute honako ekitaldiek: lehiaketak, jardunaldiak, eztabaidak, tailerrak, lehiaketak, hitzaldiak eta erakusketak, musika, antzerki, dantza, bertsolaritza, errezitaldiak eta antzekoak, baldin eta haien eragin dinamizatzailea agerian geratzen bada. Kanpoan geratzen dira nekazaritza-jarduerarekin zuzenean lotutako ekitaldiak: azokak, nekazaritzako elikagaien azokak eta tokiko jaiak, eta toki-erakundeek antolatuta, urteko programazioaren parte diren jarduerak.

Jarduerak 2025aen garatu beharko dira oso-osorik, eta diruz lagundu ahal izango dira laguntzaren xede diren jarduerak egitearekin zuzenean lotutako gastu guztiak, betiere 2025eko urtarrilaren 1etik abenduaren 31ra bitartean sortuak badira, eta justifikazio epea amaitu aurretik zerrendatuak, kuantifikatuak eta ordainduak badira:

• Langileak kontratatzeko gastuak, laguntzaren xede den ekitaldian zerbitzuak emateko.
• Zerbitzu profesionalak alokatzea ekitaldia eta jarduerak egiteko
• Lokalen alokairuak (erakunde onuradunaren egoitza sozialaren alokairua izan ezik)
• Ekitaldiak eta jarduerak egiteko instalazio eta zerbitzu teknikoak
• Laguntzaren xede diren ekitaldien publizitatearekin eta hedapenarekin lotutako gastuak.
• Nahitaezko aseguruak kontratatzea
• Emandako sariak edo trofeoak.
• Berreskuratu ezin den BEZa, BEZari buruzko legeria nazionalaren arabera.

Laguntzak ondoz ondoko prozedura baten bidez emango dira, hau da, espedienteak eskabideak aurkezteko ordenaren arabera aztertu eta izapidetuko da, eta behar bezala formulatu eta osatu diren neurrian eta hurrenkeran ebatziko dira. Laguntzak eskatzeko epea irekita egongo da dirulaguntzara bideratutako dirua agortu arte.

Informazio osagarri guztia hemen eskuratu daiteke: Landa eremua dinamizatzeko gizarte ekitaldietarako 2025 urteko laguntzak